Dagdag kasinungalingan at pang-iinsulto ang sagot ng rehimeng Arroyo sa lumalalang krisis at kahirapan sa pagpapakalat nito ng mga higanteng tarpaulin sa lansangan kung saan idinedeklara ng nakangising mukha ni Arroyo na “Ramdam ang Kaunlaran.”

Sa totoo’y walang kapantay na paghihikahos ang dama ng mamamayan sanhi ng napakalalang krisis panlipunan. Desperasyon ang kahulugan ng krisis para sa marami kung ikokonsidera pang nasa 80% ng mamamayan ang nabubuhay sa mas mababa sa P80 kada araw.

Umabot na sa 9.6% ngayong Mayo ang tantos ng implasyon o pangkalahatang pagtaas ng presyo ng mga bilihin sa bansa. Ito ay sanhi ng patuloy na pagsirit sa presyo ng pagkain at langis. Ayon pa sa ilang mga ekonomista, maaaring sa pagtatapos ng Hunyo sa taong ito, aabot pa sa lagpas 10% ang tantos na ito.

Halos lingguhan na ang pagtaas ng presyo ng langis. Hindi pa nangangalahati ang 2008 ay lagpas P15 na ang kabuuang itinaas na presyo ng gasolina, krudo, at gaas. Dahil dito, kaka-apruba pa lamang ng P8 minimum na pasahe ay nakaamba na naman ang higit pang pagtataas ng pasahe sa dyip.

Kasabay ng pagsirit na ito sa presyo ng gasolina at pamasahe ay ang patuloy na paglala ng krisis sa bigas at pagkain. Normal na ang mahahabang pila sa ating mga palengke para sa P18.50 kada kilong bigas na ibinebenta ng National Food Authority. Umaabot mula P45 hanggang P51 naman ang halaga ng “well-milled” rice.

At dahil wala namang pagtaas sa sahod, higit na madaragdagan ang bilang ng lulubog sa kahirapan. Umaabot na ngayon sa P871 ang pangangailangan ng isang pamilya habang P382 lamang ang minimum na sahod sa Kamaynilaan. Kaya naman higit sa 2.3 milyong Pilipino ang bumabagsak sa antas ng maralita sa bawat 10% na pagtaas sa presyo ng pagkain.

Sa mga paaralan, patuloy ang programa ng komersyalisasyon at paghuthot ng tubo ng mga ganid na kapitalista-edukador. Aabot sa 378 pribadong kolehiyo ang magtataas ng matrikula sa bansa sa halagang 10%. Patuloy din ang pagbagsak ng enrollment rate sa elementarya mula 108.31% noong AY 2002-2003 tungong 99.87% sa AY 2006-2007 at sekundarya mula 83.55% (AY 2002-2003) tungong 79.50% (AY 2006-2007). Aabot sa 11.6 milyon o 34% ng kabataang may edad 6-24 ang hindi na pumapasok sa paaralan.

Ang lumalalang krisis sa edukasyon ay sanhi ng patuloy na pag-abandona ng rehimeng Arroyo sa responsibilidad nitong pag-aralin ang mamamayan. P7 kada estudyante kada araw lamang ang iginagastos ng gobyerno. 2.26% lamang ng Gross Domestic Product ng bansa ang inilalaan ng gobyerno sa edukasyon, malayo sa international benchmark na anim na porsiyento.

Sa pagnanais na isalba ang sarili nito, naglulunsad ang rehimen ng mga programa tulad ng P500 subsidy sa kuryente at paglalaan ng isang bilyong pesong subsidya para sa edukasyon.

Malinaw na pagpapapogi lamang ang mga pakanang ito ng rehimen ang ugat ng nararanasang krisis ng mamamayan. Patuloy ang pagpapakatuta nito sa interes ng mga imperyalista, kartel ng bigas at langis, at mga kapitalista-edukador.

Kasabay ng pagkalantad ng kabulukan ng rehimeng Arroyo ang pagtindi ng galit ng mamamayan at ang kanilang kapasyahang kumilos para sa agaran nitong pagpapatalsik.

Sa harap ng napatinding krisis panlipunan, nakaatang sa atin ang tungkuling higit na imulat, organisahin at pakilusin ang masang mag-aaral at igiit ang mga interes ng mamamayan. Sa ating pagpasok sa paaralan, dapat nating itransporma ang krisis sa isang daluyong ng kilusang masang magpapatalsik sa rehimen at magsusulong ng pagbabagong panlipunan.

Dapat maging handa ang ating mga balangay sa pagrerekluta ng laksang bilang ng mga mag-aaral sa ating hanay at pangunguna sa mga kampanya’t pakikibakang masa sa mga susunod na linggo. Nararapat lamang na ilunsad ang mga walk-out at boykoteo sa mga paaralan laban sa napakatinding kahirapan at pambubusabos na ipinapakana ng rehimen.

Ramdam  sa kasalukuyan hindi ang kaunlaran kundi ang walang kasingtinding kahirapan. Walang kasingkatwiran na iparamdam natin sa rehimen ang galit ng mamamayan at dumadagundong na kilusang masa laban sa kabulukan ng sistemang panlipunan at patuloy na pagsalanta ng iilan at dayuhan sa kabuhayan at interes ng mamamayan. #

Ang artikulong ito ay una nang nailathala sa Commitment, opsiyal na pahayagan ng LFS. Maaaring magdownload ng kopya dito.