Atin ang Lakas, Tayo ang Pag-asa! Kabataan, Sumanib sa Masa! Isulong ang Pambansa Demokratikong Pakikibaka!

September 11, 2008

Vencer Crisostomo
Pambansang Tagapangulo, League of Filipino Students

Download .doc version: LFS 31st Anniversary Statement

Pinakamainit na pagbati at pinakamataas na pagpupugay ang ipinaaabot ng Pambansang Komiteng Tagapagpaganap sa mga lider at kasapi ng League of Filipino Students sa buong bayan sa araw na ito ng ika-31 taong anibersaryo ng pagkakatatag ng LFS.

Pinagpupugayan natin ang lahat ng mga naging kabahagi ng LFS sa magiting nitong pagtahak sa landas ng militanteng paglaban mula nang ito ay itatag noong 1977, sa gitna ng panunupil at pagsasamantala ng diktaduryang US-Marcos.

Ngayong araw ay marapat na magdiwang hindi lamang ang mga kasapi at naging mga kasapi ng LFS kundi ang mga kabataan at mag-aaral, at gayundin, ang buong bayang inaapi at pnagsasamantalahan. Marapat magdiwang ang lahat ng mga nag-aasam ng tunay na pagbabagong panlipunan at mas maaliwalas na kinabukasan, pagkat isinilang sa petsa na ito ang organisasyong simula ng kanyang pagkakatatag ay magiting na humarap sa hamon ng buong pusong paglilingkod sa masang api at makabuluhang pagbabagong panlipunan.

Mga kasama at kaibigan, tayo ay nasa napakadilim na bahagi ng ating kasaysayan. Nasa rurok ang krisis pangkabuhayan ng mamamayan, napakatindi ng kahirapan, libo-libo ang nagiging biktima ng papatinding digmang pakana ng imperyalista, at patuloy ang pagmamaniobra ng rehimeng Arroyo para higit na pahirapan ang taumbayan at makapanatili sa pwesto.

At sa panahong ito, sa panahon ng pinakamasahol na kalagayan ng ating bayan, pilit tayong pinaniniwala ng mga mapagsamantala na wala nang pag-asa. Pilit itinuturo sa mga kabataan at mag-aaral na wala nang kinabukasan, na wala nang daan para sa pagbabago, na dapat ang kabataan at taumbayan ay magtiis na lamang at magpatuloy na maging alipin sa ilalim ng kasalukuyang kalagayan.

Sa ginta ng pagtaas ng presyo ng mga bilihin at paglubog ng marami sa higit na kahirapan, dapat daw ay makontento na lamang tayo sa pagtitiis at mga kasinungalingan. Hindi na baleng kitang-kita na iilan lang ang nakararamdan ng sinsabing kaunlaran.
Papatindi ang pagkakait sa mga batayang karapatan sa kabataan at taumbayan. Sinasabi sa ating isuko na lamang ang mga ito at hayaang higit pa nila tayong alipustahin.

Sinasalakay tayo ng papatinding pakanang giyera ng imperyalista kasabwat ang tutang rehimeng Arroyo. Sinasabi nilang dapat na lamang tayong sumuko, pumayag sa kanilang kahayupan, tumayo sa isang tabi habang pinapatay ang ating mga kababayan at inaangkin ang yamang dapat ay sa atin.

Atin ang kinabukasan. Pero ang kinabukasang ibinibigay nila sa atin ay isang kinabukasang mas masahol pa sa kasalukuyan, mas lugmok kaysa lagay natin ngayon. Aangkinin ba natin ang kinabukasang inaalok ng mga naghahari-harian? Hindi kailanman.

May puwang ba sila para maniwala sa kalokohang kanilang binubulalas na susuko at mawawalan ng pag-asa ang kabataan at taumbayan? Malinaw na wala.

Dahil pinatutunayan ng kasaysayan na hindi kailanman susuko ang mga kabataan at mamamayan sa paglaban sa mapang-aping sistemang panlipunan. Hindi kailanman titigil ang taumbayan sa paglaban. Tiyak na yayakapin ng mamamayan ang pakikibaka at iwawagayway ang bandila ng kalayaan at demokrasya.

Maaari nilang lokohin ang iilan sa ilang pagkakataon, ngunit hindi lahat sa lahat ng panahon. Darating ang araw na ang maloloko na lamang nila ay ang kanilang mga sarili.

Ang tatlumpu’t isang taon ng LFS ay tanda ng magiting na paninindigan ng kabataan at mag-aaral para sa interes ng taumbayan at para sa pagbabagong panlipunan. Sa panahon ng karimlan ng Batas Militar noong 1977, pinangahasan natin na buklurin ang masang mag-aaral sa isang liga at pangunahan ang libo-libong kabataan sa pag-aalay ng talino, lakas at galing para sa masa.

Simula ng ating pagkakatatag, malinaw ang ating pagsusuri sa lipunan at ang papel ng kilusang kabataan. Ang kawastuhan ng ating linyang pampulitika, malalim na pag-aaral, at matinding pagkakaisa ang nagbitbit sa atin upang makapagkamit ng mga tagumpay at tuloy-tuloy na pagsulong at paglakas.

Ang pagsusuri natin sa katangian ng lipunang malakonlonyal at mala-pyudal, ang pagtukoy natin sa ugat ng kahirapan: Imperyalismo, Burukrata Kapitalismo, Pyudalismo at ang patuloy nating pagmumulat sa linya at programa ng Pambansang Demokrasya na may Sosyalistang Perspektiba ang sandigan ng ating tuloy-tuloy na pagmumulat, pag-oorganisa at pagkilos.

Alam natin na para maging tunay na mga pag-asa ng bayan, at para magkaroon ng tunay na lakas ang kilusang kabataan, dapat itong sumanib sa batayang masa, sa manggagawa at magsasaka at makipagkapit-bisig sa kanilang pakikibaka.

Pinanday na tayo ng karanasan at natuto sa mga pagkakamali, matagumpay nating iwinaksi ang mga maling kaisipan, pamamaraan at mga pakana para sirain ang pagkakaisa at pahinain ang kilusan ng kabataan at bayan.

Iginiit natin ang karapatan ng mamamayan sa edukasyon at nilabanan ang paniniil sa kampus. Itinulak natin ang kilusang masang nagpabagsak sa diktadurang US-Marcos at sa paglao’y sa korap at papet na rehimeng US-Estrada. Nilabanan natin ang Base Militar ng Estados Unidos at matalas na inilantad ang Imperyalismo bilang ugat ng kahirapan. Iminulat natin ang libo-libong mamamayan sa landas ng isang lipunan at kinabukasang tunay na malaya at pantay-pantay. Dahil sa mga ito at sa marami pang manininingning na tagumpay, dapat lamang tayong magdiwang at kasama ang buong sambayanang nagnanais ng pagbabago sa okasyong ito ng ika-31 nating anibersaryo.

Palakpakan natin ang ating mga lider balangay, ang mga kasalakuyang mga kasaping walang kasingsigasig at kasingtatag sa paninidigan. Ating pagpugayan ang mga nauna sa atin, ang ating alumni at mga kaibigang naging kabahagi ng kasaysayan ng LFS, at naghawan ng landas para sa kasalukuyang henerasyon.

Ngunit higit sa lahat, pinakamataas na pagpupugay, at pinakamalakas na palakpakan ang ating ialay para sa lahat ng mga martir ng kilusang kabataan na nag-alay ng kanilang buhay sa paglilingkod sa sambayanan, mula sa pag-oorganisa sa kalunsuran hanggang sa magiting na pag-aalay ng buhay para sa armadong paglaban sa kanayunan. Utang natin sa kanila ang kasalukuyang organisasyon at sila ang ating inspirasyon sa higit pang pagpupunyagi at tuloy-tuloy na paglaban.

Sa kasalukuyan pang pagsahol ng krisis at pagsasamantala, natitiyak nating lalong titindi ang paglaban ng kabataan at bayan. Ating ipapahiya ang mga nagmamaliit sa kilusan ng kabataan at mamamayan. Mangangamba ang mga naghaharing desperado sa pangangayukapit sa kapangyarihan. Sa pangunguna ng LFS, tiyak na mas marami pang mga kabataan ang titindig at aangkin sa isang kinabukasang tunay na malaya at masagana para sa bayan at masa.

Ipapamandila natin sa buong bayan na sa ating paglubog at paglilingkod sa batayang masa, nasa ating pagkakaisa ang lakas. At sa sama-samang pagkilos para sa pambansang demokrasya, tunay na tayo ang pag-asa. Imulat natin ang mga kabataang naghahanap ng direksyon at mga kababayang handang lumaban sa wastong landas ng pambansa demokratikong rebolusyon.

Buuin natin ang daan-daang mga bagong balangay sa buong bayan at magpunyagi sa pagmumulat, pag-oorganisa at pagpapakilos. Padagundungin natin ang panawagang “Mag-aral, Maglingkod at Makibaka!” sa mga paaralan at unibersidad. Samahan natin ang masang manggagawa at magsasaka sa kanilang laban para sa karapatan at pagbabagsak ng lipunang mapang-api. Iwaksi natin ang ating mga kahinaan at itaguyod ang simpleng pamumuhay at puspusang pakikibaka.

Magbibigay pag-asa ang tula ni Ka Amado V. Hernandez:

May araw ding ang luha mo’y masasaid, matutuyo,
May araw ding di na luha sa mata mong namumugto
Ang dadaloy, kundi apoy, at apoy na kulay dugo,
Samantalang ang dugo mo ay aserong kumukulo;
Sisigaw kang buong giting sa liyab ng libong sulo
At ang lumang tanikala’y lalagutin mo ng punglo!

Mga kasama, tiyak ang araw ng pagtatagumpay. Babagsak ang paghahari ng iilang tuta at mapagsamantalang dayuhan. Mananagot sa taumbayan ang mga pasista at kriminal na nasa puwesto. Dadagundong ang kilusan mula sa mga rebolusyunaryong base sa kanayunan hanggang kalunsuran at ititindig ang isang bayang tunay na malaya at masagana hanggang sa ganap na pagkapantay-pantay.

Atin ang lakas, tayo ang pag-asa! Kabataan, maglingkod sa masa!

Ibagsak ang rehimeng US-Arroyo! Isulong hanggang tagumpay ang Pambansa Demokratikong Rebolusyon!

Mabuhay ang ika-31st anibersaryo ng League of Filipino Students! #